Pueʹrab neʹtt šõõddi õõut aassi jurddjest – mäddvuʹvddteäggtõs puuʹti čuõvvkooid Keväjäurra

02.12.2025 15:43Lappi, Valtakunnallinen

Aanrest leʹddi Keväjääuʹr aassi ǩiõʹrdde kuuʹǩǩ puåtkknõddi da meälǥas neʹttõhttvuõđin. Oʹdinakai siid kääzzkõʹstti 4G-tuärjjsâjldõk lij viiđ ǩilomettar ǩeeʹjjest, ij-ǥa tõn kapasiteʹtt riʹjttjam aassji lâssneei taarbid. Videosåbbar puåtkknõʹdde, vuõiggnobstemkääzzkõõzz jie toiʹmmjam di aaʹšši håiddmõš neeʹttest leäi vaiggâd.

Mååustmaʹcci jurddjest šõõddi siid õhttsaž projeʹktt

Keväjääuʹrest šõddâm Joni Gauriloff leäi mäccam šâddsijddses mättʼtõõttâm- da reâuggiiʹjji mâŋŋa. Neʹttvaiggâdvuõđ kuâsttje aarǥâst nuʹtt, što son seʹlvvteškueʹđi, mäʹhtt čuõvvkoiddõhttvuõđ vuäitči vuäǯǯad suu põʹrtte.

Eeʹjj 2021 son vuâđđii Osuuskunta Keväjärven Kuitu -nõmmsaž vuässõskååʹdd. Sõrgg mieʹldd pueʹđi lååi oummu aktiivlaž joukk, da pueʹtti eeʹjj ǩeässa neʹttsääiʹm raajjâmtuâj aʹlǧǧe.

”Keväjääuʹrest lie še ääiʹjben kåittam altteed haʹŋǩǩõõzz, leâša tõt lij pâi kåmmnam. Čuõvvkoiddsääiʹm raajjmõš lij jõnn tuâjj õõut ooumže da siʹjdde”, son ǩeärddad haʹŋǩǩõõzz aalǥ.

Mäddvuʹvddteäggtõs vueiʹtlvõõʹsti haʹŋǩǩõõzz

Markkânmääinlânji čõõđtum čuõvvkoiddõhttâm leʹčči mähssam čuuʹt jiânnai – pâʹjjel 10 000 euʹrred õõut dommtallu. Ääʹšš mõõnškueʹtte ooudårra, ko Gauriloff vaaʹldi õhttvuõđ Tunturi-Lapin Leader -jouʹǩǩe. Toʹben son vuäǯǯai teâđ EU kobddneʹttlinjjteäggtõõzzâst da tääʹrǩes vieʹǩǩ tõn ooccma.

”JJP-kõõskõõzzâst vuäǯǯaim še šiõǥǥ vuäʹppõõzzid. Toʹben lie samai fiin oummu vueiʹtlvâʹsttmen čuõvvkoiddteäggtõõzzid da puuʹttes haall vuäǯǯad täid projeeʹktid mäddvoudda”, Gauriloff späʹssbââšš.

Aanar kåʹdd miõđi haʹŋǩǩõʹsse 110 000 eeuʹr mostt-teäggtõõzz, koin koolaid maʹhsseš ouddâl ko JJP-kõõskõs maauʹsi tuärjjõõzzid mââiǩiõʹtte.

”Tät haʹŋǩǩõs ij leʹčče šõddâm tuõttân mäddvuʹvddteäggtõõzz- da Aanar kååʹdd saʹtssjummšitää”, son teäddad.

Keväjääuʹr õutstõs tuejjii kõrrset tuâj haʹŋǩǩõõzz ouʹdde. Puk sijddneeʹǩǩ vuässõʹtte jiõččtäättlaž tuõjju määŋgnalla: pävvrõõžžeeʹl jiõččtäättlaž tuâjjlaid, vieʹǩǩteeʹl kaapeltuâjain leʹbe ohjjeeʹl jååttlõõǥǥ. Õõutveäkka sij raʹjje 13 ǩilomettar čuõvvkoiddsääiʹm, kååʹtt kääzzkâstt ååʹn nuʹtt 65 dommtääl.

Njueʹbǯǯlab argg da tuâjjpeeiʹv puåtkknõddi såbbritää

Ko čuõvvkoiddsääiʹm vaʹlddeš ââʹnnma ǩeâđđa 2023, argg siidâst šõõddi jiânnai hiâlpben.

”Jõs Keväjääuʹr sijdd leʹčči õlggâm tåimmad tåʹlǩ 4G-õhttvuõđin, ij aarǥâst da reâuggmest leʹčče šõddâm ni mii. Čuõvvkoiddsäiʹmm pohtt miârkteei staan: toiʹmmjeei õhttvuõđ vueiʹtlvâʹstte ougglõstuâj, ougglõs-škooul, põõrǥâstoiʹmmjummuž da âsttääiʹj, mâʹte puârast toiʹmmjeei vuõiggnobstemkääzzkõõzzid da speâllaid”, Gauriloff kovvââll.

Keväjääuʹr oʹnnstam haʹŋǩǩõs oudd ärvvsaž määttaid še jeeʹres siidid. Jõs niõǥǥad sijddses čuõvvkoiddõhttvuõđ, Gauriloff vuäʹppast ooccâd vieʹǩǩ pääiklaž Leader-jooukâst. Toʹben vuäǯǯ jiânnai äukkas viiŋkid neʹttsääiʹm raajjmõʹšše. Tärkka tuejjuum ouddtuâj lie lokkčooud oʹnnstummša.

”Kaʹnnat kõʹllʼjed juõʹǩǩ siid põõʹrtest, mušttled čuõvvkoiddhaʹŋǩǩõõzzâst di kõõččâd, haaʹlee-a oummu vueʹlǧǧed mieʹldd. Neʹttsääiʹm plaanummuš lij samai vääžnai – tõõzz lij pueʹrmõs väʹldded ämmatneeʹǩǩ, kååʹtt vuäitt håiddad še looʹvid”, vuäʹppast Gauriloff.